Localisation:


Menu:
Internetowa Liturgia Godzin

Die 25 ianuarii
IN CONVERSIONE S. PAULI, APOSTOLI
Festum

Tertia



V. Deus, in adiutórium meum inténde.
R. Dómine, ad adiuvándum me festína.
Glória Patri, et Fílio, et Spirítui Sancto.
Sicut erat in princípio, et nunc et semper,
et in sæcula sæculórum. Amen. Allelúia.


Nunc, Sancte, nobis, Spíritus,
unum Patri cum Fílio,
dignáre promptus íngeri
nostro refúsus péctori.

Os, lingua, mens, sensus, vigor
confessiónem pérsonent,
flamméscat igne cáritas,
accéndat ardor próximos.

Per te sciámus da Patrem,
noscámus atque Fílium,
te utriúsque Spíritum
credámus omni témpore. Amen.

Vel:

Certum tenéntes órdinem,
pio poscámus péctore
hora diéi tértia
trinæ virtútis glóriam,

Ut simus habitáculum
illi Sancto Spirítui,
qui quondam in apóstolis
hac hora distribútus est.

Hoc gradiénte órdine,
ornávit cuncta spléndide
regni cæléstis cónditor
ad nostra ætérna præmia.

Deo Patri sit glória
eiúsque soli Fílio
cum Spíritu Paráclito,
in sempitérna sæcula. Amen.


Ant. Saule frater, Dóminus misit me, Iesus, qui appáruit tibi in via, ut vídeas et impleáris Spíritu Sancto.


Psalmi de feria currente


Ant. Saule frater, Dóminus misit me, Iesus, qui appáruit tibi in via, ut vídeas et impleáris Spíritu Sancto.


1 Tim 1, 12-13

Grátias ago ei qui me confortávit, Christo Iesu Dómino nostro, quia fidélem me existimávit, ponens in ministério, qui prius blasphémus fui et persecútor et contumeliósus; sed misericórdiam Dei consecútus sum.

V. Gaudéte et exsultáte, dicit Dóminus.
R. Quia nómina vestra scripta sunt in cælis.



Orémus. Deus, qui univérsum mundum beáti Pauli apóstoli prædicatióne docuísti, da nobis, quæsumus, ut, cuius conversiónem hódie celebrámus, per eius ad te exémpla gradiéntes, tuæ simus mundo testes veritátis. Per Christum Dóminum nostrum. Amen.


Saltem in celebratione communi, additur acclamatio:

V. Benedicámus Dómino.
R. Deo grátias.



 Based on LITURGIA HORARUM IUXTA RITUM ROMANUM (editio typica)